機師討論完燃油量同注意事項後，就要準備飛機啦！首先機師會睇維修紀錄 Tech Log，了解飛機有無任何特別事項需要留意。如果有待修事項，就要確認飛機是否合符規格，可以安全合法地起飛。間中就會有新聞報導乘客見到飛機用膠紙痴痴貼貼，擔心飛行安全。其實大家見到嘅膠紙係專門用於飛機嘅 Speed Tape，合符規格用於暫時性維修，可以抵受高空高速飛行，並非一般嘅封箱膠紙。如果飛機有用到 Speed Tape 的話，都會記錄於上。
翻查完 Tech Log 確認飛機無問題，就會用機場提供嘅 ATIS 做一次 Takeoff Performance。Automatic Terminal Information Service (ATIS) 內客包括目前使用跑道、風向、風速、能見度、雲底高度、溫度及氣壓等等。機師會用 ATIS 提供嘅資料，加上跑道限制及飛機各項資料去計算 Takeoff Performance，確保飛機可以安全起飛。
之後其中一位機師就會落停機坪做 Walk Around 對機身做檢查，確認機身狀況同維修紀錄相符以及留意儀器零件狀況，例如量度氣壓嘅 Pitot Tube 同 Static Tube 有無被阻塞、於地面鎖住飛機起落架嘅 Gear Pin 有無移走、引擎內有無異物等。Virgin Australia 就試過 Engineer 做 Preflight Check 嘅時候搵到有隻貓頭鷹係引擎入面！
當一位機師係停機坪 Walkaround 嘅時候，另一位機師就會負責設定飛機。例如輸入同檢查飛行電腦內嘅 Flight Plan，確認飛行路線同向各國遞交嘅 Flight Plan 一致。就好似地上有不同嘅道路俾車輛行駛，高空亦有指定嘅 Airway 俾飛機飛行，民航機要跟隨指定路線唔可以隨意偏離航道。除此以外，亦要設定同檢查不同嘅飛行儀器，如高度計、導航儀器顯示是否合理。負責 Walkaround 嘅機師完成檢查返回駕駛艙後會獨立檢查各項設定，確保一切正確無遺漏。
__________________
【機師的工作日常】系列
No comments
Post a Comment