瞓酒店的惡夢

人在外地酒店房瞓醒，諗起入職初期經常係酒店驚到發惡夢。獨自一個係酒店房最驚嘅唔係鬼（雖然經常聽 Crew 講佢地嘅經歷），係驚收唔到一個重要電話。

每次 Check in 嘅時候，酒店都會提供我地離開當日嘅 Wake up time 同 Pick up time。Pick up time 就係公司提供去機場嘅 Crew bus 車我地去機場嘅時間，基本上係逾時不候。Wake up time 通常會係 Pick up 前一個鐘，酒店會打電話上房確保嘈醒你。

初時未習慣，經常都好擔心聽完電話又瞓返、聽唔到電話響、酒店漏咗打俾我，擔心到發惡夢夢見自己遲咗趕唔切上機。而且呢一切擔心並非杞人憂天！

曾經有同事戴耳塞瞓覺，聽唔到電話響。酒店就派職員親身上房開門搵人。最後佢醒嘅時候係見到兩個著西裝嘅人企係床邊，以為有特工嚟捉佢走。啱啱瞓醒唔清醒，見到咁嘅情況都應該會幾驚。

至於酒店漏打 Wake up call 其實都時有發生，有時係漏幾個，有時係成 set crew 都無人收過電話。兩難嘅情況係自己較鬧鐘可以解決呢個問題，但如果當日航班延誤酒店係會推遲 Wake up call 俾 Crew 盡量休息，自己較鬧鐘就可能會明明可以瞓多兩個鐘，但醒咗瞓唔返影響休息。

本身覺得驚到發惡夢係咪自己小題大做，同同事傾起先發現原來 I'm not alone！好多都話佢地都經歷過呢個階段，一段日子之後就會習慣。的確飛咗幾年，依家係酒店都瞓得好安樂無再發惡夢啦！

_________________

至於驚唔驚鬼，曾經係酒店業嘅屋企人由 Day 1 就提醒我：1）入房要敲門；2）如果見到房有一本打開嘅聖經，可以同酒店要求換房而職員應該唔會過問原因。

另外表示自己有特別體質嘅同事話試過感應到，但佢真係攰到連驚都無力，只係講咗句「呢間房我用嚟瞓㗎咋，你自便啦唔好搞我。」然後，就相安無事了。

信不信，就由你啦。