打風去邊好？

颱風天橫風橫雨，當然係留係屋企最安全啦。但如果係架飛機遇上颱風返唔到香港，咁去邊好呢？係「天鴿」襲港前一日剛剛飛左去 Outport，夜晚同隊長仲有 FO 一齊食飯（定計香港宵夜？）都留意緊個風向。當時預計颱風最接近香港時間正正就係我地回程抵港時間，大家已經諗緊可能要轉飛去第二個機場同會有航班延誤。果然第二朝就收到公司通知班機會延遲起飛時間，原本的捱眼瞓 Night Flight 就變左做比較輕鬆的 Day Flight。

平時返港的航班通常都會選擇澳門機場作為後備機場，但如果係因為天氣問題而無法係香港機場降落的話，其實澳門機場的情況都不會太好。今次航班 Flight Plan 計劃以台北為後備機場，另外再帶額外燃油為空中盤旋排隊或轉飛其他機場作準備。係接近十二小時的飛行時間，我地一路都留意住香港同附近其他機場天氣情況。天氣資料包括 ATIS、METAR 同 TAF：

ATIS (Automatic Terminal Information Service) 終端資料自動廣播服務

提供即時的機場天氣資料，包括使用中的跑道、風向及風速、能見度等等

香港機場 ATIS：http://atis.cad.gov.hk/ATIS/ATISweb/atis.php

METAR (Meteorological Terminal Aviation Routine Weather Report) 航空例行天氣報告

每隔一小時或半小時發出一次，提供比較短的指定時間內觀察到的天氣資料
香港天文台有簡單介紹同解讀 METAR

介紹：http://www.hko.gov.hk/aviat/wxobs_decode.htm

解讀：http://www.hko.gov.hk/aviat/decode_metar_ec.htm

TAF Terminal Aerodrome Forecast 機場天氣預報
提供預測期內預料會出現的天氣資料，預測期可以長達十二小時
機師可以 TAF 做比較長遠的計劃同留意天氣發展趨勢。香港天文台都有簡單介紹同解讀 TAF 的資料

介紹：http://www.hko.gov.hk/aviat/taf_decode.htm

解讀：http://www.hko.gov.hk/aviat/decode_taf_ec.htm

航程中途的時候，香港機場的情況依然不太樂觀。呢個時候就真係要認真諗下「到底去邊好？」。決定去邊個機場都要考慮好多唔同的因素，首先最重要當然是候選機場的天氣情況，繼而再考慮當地有無公司支援、旅客的簽證、地區安全等等。另外公司都會提供其他航班的降落同機場資訊。

按照計劃去台北？但如果我地唔係算比較早到的航班，大家都打算轉飛台北的話，去到台北又係要排大隊。而深圳同峴港機場的天氣情況似乎唔錯可以考慮。當時身邊的 FO 同我講：「呢個可能係你第一次嘅 Diversion 喎！」有得做未試過的 Diversion 我唔肯定係開心定唔開心好，但我肯定開心嘅係我地飛緊 A350，電腦系統容許儲存三個後備計劃，方便我地計劃同隨時轉飛後備機場。

咁最後我地班機去左邊呢？係大家開開心心的安全返抵香港，不過拎行李境要等返陣囉 :P